ჩვენს შესახებ
პოპულარული
სტატიების არქივი
გამოკითხვები
რა ტიპის სტატიებს ისურვებდით ?
ტერი ბისონი - ისინი (თარგმანი ჯაბა ვაშაყმაძისა)
თარგმანი ჯაბა ვაშაყმაძისა
_ ისინი ხორცისანი არიან.
_ ხორცი?
_ ჰო, ხორციდან არიან შექმნილები.
_ ხ ო რ ც ი დ ა ნ?!
_ შეცდომა გამორიცხულია, ჩვენ რამდენიმე ეგზემპლარი შევამოწმეთ პლანეტის სხვადასხვა კუთხიდან, აბსოლუტურად ხორცისაგან შედგებიან. სიზუსტისათვის ნიმუშები ხომალდზე, ლაბორატორიაში გადავამოწმეთ, მთლიანად ხორცისანი არიან.
_ ეს დაუჯერებელია, უბრალოდ წარმოუდგენელი! მაგრამ რადიო სიგნალები, რომლებიც ვარსკვლავებისაკენ გამოგზავნეს?
_ კავშირისა და ურთიერთობისათვის რადიო სიგნალებს იყენებენ, მაგრამ სიგნალებს მანქანების მეშვეობით აგზავნიან.
_ მაგრამ ვინ შექმნა ეს მანქანები... აი, ვისთან უნდა გავიდეთ კავშირზე!..
_ ჰმ, თავად ისინი აკეთებენ ამ მანქანებს, ვერ ხვდები? ხორცი ქმნის მანქანებს.
_ რა სისულელეა! როგორ შეიძლება ხორცმა მანქანა შექმნას? შენ გინდა დავიჯერო, რომ ხორცს მეხსიერება და გრძნობები აქვს?
_ მე არაფერიც არ მინდა, უბრალოდ გიყვები იმას, რაც არის. ამ უზარმაზარ სექტორში ერთადერთი მოაზროვნე არსებები არიან და მთლიანად ხორცისგან შედგებიან.
_ იქნებ ორფოლეებს გვანან, ხომ გახსოვს კარბონის ინტელექტი, რომელიც განვითარების ერთ-ერთ ეტაპზე ხორცის ფაზას გადის.
_ არა,ისინი თავიდანვე ხორცად იბადებიან და ხორცადვე კვდებიან. ჩვენ ისინი სიცოცხლის რამდენიმე ციკლში შევისწავლეთ. სხვათაშორის, საკმაოდ ხანმოკლე სიცოცხლე აქვთ. წაროგიდგენია, რამდენ ხანს ცოცხლობს ხორცი?
_ კარგი რა, შემიბრალე… იქნებ მთლიანად ხორცისანი არ არიან, გახსოვს, ვედლეები ხორცის თავით და ელექტრო-პლაზმური ტვინით.
_ არა! თავიდან ჩვენც ასე გვეგონა, რადგან ხორცის თავი აქვთ, მაგრამ ხომ გითხარი, თავიდან ბოლომდე შევამოწმეთ, ტესტებმა აჩვენა,რომ სრულად ხორცისგან შედგებიან. რაც არის გარედან, იგივეა შიგნიდანაც.
_ მაგრამ ტვინი?
_ ტვინი აქვთ, ამ მხირვ ყველაფერი რიგზეა, ოღონდ ტვინიც ხორცისგანაა.
_ და აზრები საიდან ებადებათ?
_შენ რა ვერ ხვდები? აზრებს ტვინი აწარმოებს, - ხორცი!
_ჰაჰ, შენ გინდა დაგიჯერო,რომ ხორცი აზროვნებს? გონიერი ხორცი?!
_ დიახ, ეშმაკმა დალახვროს!..ხორცი,რომელიც გონიერია; ხორცი, რომელიც აზროვნებს; ხორცი, რომელსაც სინდისის განცდა აქვს; ხორცი, რომელიც სიზმრებს ხედავს. გესმის,ისინი მთლიანად ხორცისგან შედგებიან.
_ ო, ღმერთო ჩემო, ამას სერიოზულად ამბობ?
_ აბსოლუტურად სერიოზულად გეუბნები და უკანასკნელი 100 წელიწადია კავშირზე გამოსვლას ცდილობენ.
_ და რა უნდათ?
_ დიალოგი, შემდეგ სამყაროში წანწალი და ხეტიალი, უნდათ გაიცნონ სხვა სამყაროთა სწავლულები,მოიპარონ და დააკოპირონ სხვების იდეები.., მოკლედ, ყველაფერი ისე, როგორც ხდება ხოლმე.
_ ესე იგი, ჩვენ მოგვიწევს ხორცს დაველაპარაკოთ?
_ ამაშია საქმე, მათი გზავნილები სავსეა შორისდებულებით და შეკითხვებით. ალლო, ალლო, არის აქ ვინმე?! გთხოვთ დაგვიკაშირდეთ! მოკითხვა ჩვენგან, დედამიწა არის ესე...
_ გამოდის, რომ სიტყვების მეშვეობით ლაპარაკობენ და ურთიერთობენ, აწყობენ იდეებს და კონცეფციებს?
_ და მერე როგორ... იცი, რა მგზნებარე ტემპერამენტი აქვთ!
_ მაგრამ შენ მითხარი,რომ რადიოს იყენებენ.
_ რა თქმა უნდა, ერთი განახა... რადიო სიხშირე სავსეა ხორცის ხმით. იცი, ძალიან უცნაური მოსასმენია როდესაც ხორცი ხმას გამოსცემს. განსაკუთრებით მაშინ, როდესაც ხორცი ხორცს ეხება. მღერიან კიდეც შეკუმშული ჰაერის მეშვეობით.
_ მდააა... გაგიჟდე შეიძლება, მომღერალი ხორცი. ეს უკვე მეტისმეტია.
_ კარგი და რას მირჩევ, როგორ მოვიქცეთ?
_ ოფიციალურად თუ ჩვენ შორის?!
_ არა, ედაკ, მოდი, პირადად ვთქვათ ჯერ.
_ ოფიციალურად ჩვენ ვალდებულები ვართ გავიდეთ კავშირზე, მივცეთ მთლიან რეესტრზე წვდომა, რათა მოაზროვნე არსებებს დაუკავშირდენენ ყოველგვარი შეზღუდვებისა და წინაპირობების გარეშე. მაგრამ ჩვენ შორის თუ დარჩება, მე წავშლიდი ყველანაირ მონაცემებს მათ შესახებ.
_ იმედი მქონდა, რომ ამას მიპასუხებდი, რატომ ავიტკიოთ აუტკივარი თავი?! რაში გვჭირდება ხორცთან ურთიერთობა. მართალია, ეს საქციელი იძულებითია, მაგრამ აუცილებელი...
_ აბა რა, რად გვინდა მოაზროვნე ხორცთან ნაცნობობა. ან რა უნდა ვუთხრათ: ,,გამარჯობა ხორცო, როგორ ხარ"... კი მაგრამ, შემდეგ რა ხდება, რამდენ პლანეტაზე არიან დასახლებულები?
_ მხოლოდ ერთზე, მათ მოგზაურობა სპეციალური მეტალის კონტეინერებით შეუძლიათ, მაგრამ მუდმივად კონტეინერებში ყოფნა არ ძალუძთ. თანაც მხოლოდ c განზომილებაში გადაადგილდებიან, სინათლის სისწრაფეზე საუბარიც ზედმეტია. ასე რომ, კონტაქტზე გამოსვლის ნულოვანი შანსი აქვთ.
_ მაშინ გამოდის, რომ სამყაროში არავინაა და ჩვენც ისე მოვიქცეთ, რომ ვერც შევამჩნიეთ.
_ ზუსტად ასეა.
-მაგრამ ხომალდზე ვინც გყავდათ ტესტირებაზე, დარწმუნებული ხარ, რომ არაფერი ემახსოვრებათ?
_ თუ ემახსოვრებათ,მერე რა? ისედაც ფსიქოპატად ჩათვლიან თავისნაირები, რა პრობლემაა. მათ მეხსიერებაში შევაღწიეთ და როგორც სიზმარი, ისე გავახსენდებით.
_ ჰაჰა, გაგიჟდე შეიძლება. წარმოგიდგენია, ჩვენ ვესიზმრებით ხორცს.
_ კეთილი. მოდი, ეს სექტორი რუქაზე როგორც ცარიელი, ისე გავწეროთ, რას იტყვი?
_ ძალიან კარგი, მშვენიერია! საქმე დახურულია. როგორც ოფიციალურად, ასევე ჩვენ შორის. საინტერესოა, კიდევ რა არის გალაკტიკის იმ კიდეზე?
ახალი სტატიები
ახალი ნომერი
პირადი კაბინეტი
სხვადასხვა